కరోనా వైరస్ వ్యాప్తికి సంబంధించి మరో కీలక విషయాన్ని వెల్లడించారు చైనాలోని యాంగ్జౌ యూనివర్సిటీ పరిశోధకులు. మూత్రశాలల్లో ఫ్లష్ చేసినా వైరస్ కణాలు గాల్లోకి చేరి ఇతరులకు వ్యాప్తి చెందుతున్నట్లు గుర్తించారు. ఇందుకు సంబంధించిన అధ్యయనం 'ఫిజిక్స్ ఆఫ్ ఫ్లుయిడ్స్' జర్నల్లో ప్రచురితమైంది.
మలం, మూత్రం ద్వారా వైరస్ వ్యాప్తి చెందే అవకాశాలున్నాయని ఇప్పటికే పలు అధ్యయనాలు స్పష్టం చేశాయి. తాజాగా చైనా శాస్త్రజ్ఞులు నిర్వహించిన పరిశోధనలో యూరినల్స్ ఫ్లష్ చేసినప్పుడు గ్యాస్, ద్రవాల కలయికతో జరిగే చర్య ద్వారా వైరస్ కణాలు గాలి తుంపర్లుగా మారి వ్యాప్తి చెందుతున్నట్లు గుర్తించారు. ఫలితంగా యూరినల్స్ కూడా కరోనా వ్యాప్తికి కేంద్రబిందువులయ్యే ప్రమాదం ఉందని హెచ్చరించారు. అందుకే పబ్లిక్ టాయిలెట్స్కి వెళ్లినప్పుడు తప్పనిసరిగా మాస్క్ ధరించాల్సిన అవసరం ఉందని సూచించారు.
మూత్ర విసర్జన ద్వారా విడుదలయ్యే చిన్న వైరస్ కణాలు ఫ్లష్ చేసినప్పుడు గాల్లోకి వ్యాప్తి చెందేందుకు 35 సెకన్ల వరకు సమయం పడుతుందని పరిశోధకులు తెలిపారు.
